बालेनको अभिव्यक्तिप्रति झलनाथ खनालको आपत्ति, माफी माग्न आग्रह

१८ जेठ,  काठमाडौं ।  नेपाल कम्युनिष्ट पार्टी (नेकपा)का नेता झलनाथ खनालले प्रधानमन्त्री बालेन शाहले संसदमा दिएको अभिव्यक्तिलाई गलत, गम्भीर र राष्ट्रविरोधी रहेकाे बताएका छन्। सामाजिक सञ्जालमा लेख्दै उनले प्रधानमन्त्री बालेन्द्र साहले प्रतिनिधि सभामा बोल्दा नेपालले समेत भारतका जग्गा मिचेको खतरनाक अभिव्यक्ति दिनु अत्यन्त गम्भीर, दुखद, गलत र राष्ट्रविरोधी अभिव्यक्ति भएको बताएका हुन् ।

खनालले प्रधानमन्त्रीकाे उक्त अभिव्यक्तिले नेपाली जनताको राष्ट्रिय भावनामाथि चोट पुर्‍याएको बताएका छन्। उनले यस्तो दाबी कुन तथ्य र प्रमाणका आधारमा गरिएको हो भनेर प्रश्न समेत उठाएका छन्।

उनले लेखेका छन्, ‘हामी नेपाली जनता युगौँ देखि विदेशी अतिक्रमणका विरुद्ध संघर्ष गर्दै आएका छौँ र अहिले पनि हाम्रो देशमाथि अतिक्रमण भइरहेको छ । त्यस्ता कार्यलाई हलुका बनाउने र विदेशीहरूको चाकडी गर्ने हिसाबले यस्ता अभिव्यक्ति दिनु राष्ट्रविरोधी कार्य हो ।’ खनालले भनेका छन्, ‘उहाँले कुन तथ्य, कुन प्रमाण र कुन दस्तावेजका आधारमा यस्तो खतरनाक अभिव्यक्ति दिएको हो ?’

खनालले प्रधानमन्त्रीको अभिव्यक्तिले देशभित्र र बाहिर रहेका ३ करोड नेपाली जनताको देशभक्तिपूर्ण भावनामाथि कुठाराघात भएको बताएका छन् । राष्ट्र विरोधी अभिव्यक्ति दिने यस्ता व्यक्तिलाई देशको प्रधानमन्त्रीको कुर्सीमा बस्न नसुहाउने उनको तर्क छ ।

खनालले प्रधानमन्त्री शाहले सार्वजनिक रूपमा माफी माग्नुपर्ने माग गर्दै उक्त अभिव्यक्ति संसदको रेकर्डबाट हटाउन सभामुखसँग आग्रह गरेका छन्। साथै, उनले देशभक्त नागरिकलाई उक्त अभिव्यक्तिको विरोध गर्न आह्वान पनि गरेका छन्।