बुद्धभूमि नेपाल हाइड्रोको हकप्रद सेयर बाँडफाँड, ४ लाख ७४ हजार कित्ता लिलामीमा आउने

८ जेठ, काठमाडौं। बुद्धभूमि नेपाल हाइड्रोपावर कम्पनी लिमिटेडको हकप्रद सेयर बाँडफाँड भएको छ । कम्पनीले गत चैत २२ गतेदेखि २०८३ वैशाख २८ गतेसम्म जारी गरेको हकप्रद जेठ ७ गते बाँडफाँड गरेको हो । कम्पनीले २०८२ माघ २९ गतेसम्म नेप्सेमा कारोबार भई कायम भएका सेयरधनीहरुका लागि हाल कायम चुक्ता पूँजी ४० करोड रुपैयाँको १ः१ अनुपातमा प्रतिकित्ता १०० रुपैयाँ अंकित दरका ४० लाख कित्ता हकप्रद निष्कासन गरेको थियो ।

 उक्त हकप्रदमा रितपूर्वक आवेदन दिने सेयरधनीहरुलाई ३५ लाख २५ हजार ३०४ कित्ता हकप्रद बाँडफाँड गरिएको धितोपत्र निष्कासन तथा बिक्री प्रबन्धक एनआईसी एशिया क्यापिटलले जनाएको छ । सो अवधिमा कम्पनीको ४ लाख ७४ हजार ६९६ कित्ता हकप्रद भने बिक्री हुन सकेन । कम्पनीले उक्त अवितरित हकप्रद सेयर लिलामीमार्फत सर्वसाधारणलाई बिक्री गर्नेछ ।

साथै, बाँडफाँडमा नपरेको हकप्रद सेयरबापतको रकम जेठ ८ गतेदेखि आईपीएसमार्फत सम्बन्धितको बैंक खातामा रकमान्तर गरिने कम्पनीले जनाएको छ ।