संसद् पुनःस्थापनाका लागि अदालत जाने एमालेको दोस्रो निर्णय, महेश र सुनिताले पाए जिम्मा

३ मंसिर, काठमाडाैँ । नेपाल कम्युनिष्ट पार्टी (एमाले) प्रतिनिधिसभा पुनःस्थापनाको माग गर्दै सर्वाेच्च अदालतमा रिट निवेदन लिएर जाने भएको छ ।
एमालेले यही विषयमा अदालत जाने भनेर निर्णय गरेको यो दोस्रो पटक हो । यसअघि पनि एमालेले अदालत जाने निर्णय गरेको थियो तर पछि पार्टी नै अदालत जाने होइन पार्टी निकटका शुभेच्छुक कानुन व्यवसायी जाने हो भनेर नेताहरूले व्याख्या गरेका थिए ।

एमालेबाट विघठित प्रतिनिधिसभामा रहेका सदस्यहरूको मंगलबारको बैठकले हस्ताक्षरसहित रिट निवेदन लिएर जाने निष्कर्ष निकालेको पार्टीका प्रमुख सचेतक महेश बर्ताैलाले जानकारी दिनुभयो । निवेदन दर्ताका लागि बर्तौला र सचेतक सुनिता बराललाई अख्तियारी दिइएको छ ।

एमालेको केन्द्रीय कार्यालय, च्यासलमा भएको बैठकमा पार्टी अध्यक्ष एवं पूर्वप्रधानमन्त्री केपी शर्मा ओलीले संसद् पुनःस्थापनाका लागि कानुनी उपचार र शान्तिपूर्ण सङ्घर्षमा जानुपर्ने धारणा राख्नुभएको थियो ।