एमाले छाडेकालाई ओलीको अपिलः जहाँ हुनुहुन्छ, घर फर्कनुस्

१४ कात्तिक, काठमाडौँ । नेकपा (एमाले)का अध्यक्ष केपी शर्मा ओलीले पार्टी छाडेका नेता–कार्यकर्तालाई पुनः पार्टीमा फर्किन आव्हान गर्नुभएको छ ।

अध्यक्ष ओलीले सामाजिक सञ्जालमार्फत सन्देश जारी गर्दै विगतमा एमालेको निर्माण र सुदृढीकरणमा साथ दिएका सबैलाई “फर्किनुस्, आफ्नै घर फर्किनुस्” भन्दै आह्वान गर्नुभएको हो ।

‘एमाले केवल एउटा राजनीतिक संगठन होइन, यो जनताको रगत, पसिना, आँसु र आशाबाट बनेको विशाल परिवार हो,’ ओलीले भन्नुभएको छ, ‘तीन पुस्ताले यस पार्टीको जग बसाल्न जीवनका उज्याला क्षण समर्पण गरेका छन्।’

उहाँले पार्टीका संस्थापक र योगदान दिने सबै नेताकार्यकर्ताको स्मरण गर्दै लोकतान्त्रिक संविधान, राष्ट्रिय स्वाधीनता र जनताको हितका पक्षमा एकजुट हुन आग्रह गर्नुभएको हो ।

‘देशको सार्वभौम अस्तित्वमाथि चुनौती खडा भइरहेको छ, लोकतान्त्रिक संविधानमाथि आक्रमण भइरहेको छ। यस्तो बेला मौन बस्न सकिँदैन,’ ओलीको सन्देशमा भनिएको छ, ‘राष्ट्रिय एकता, देशको स्वाभिमान र लोकतन्त्रको रक्षाका लागि हामी सबै एउटै मन र एउटै स्वरमा अघि बढ्नुपर्छ।’

अध्यक्ष ओलीले पार्टी छोडेर अन्यत्र गएका कार्यकर्तालाई भ्रममा नपर्न पनि आग्रह गर्नुभएको छ । ‘कोही अलमलमा नपर्नुस्, आउनुस् आफ्नै घरमा हाम्रो साझा सपना साकार पार्न,’ उहाँले भन्नुभएको छ ।

उहाँका अनुसार एमाले नै समृद्ध नेपाल, सुखी नेपालीको लक्ष्य पूरा गर्न सक्षम राजनीतिक शक्ति हो। ‘निर्णायक राष्ट्रिय शक्ति निर्माणमा जुटौं,’ ओलीले सन्देशमा भन्नुभएको छ ।

यस्ताे छ ओलीकाे सन्देशः

दिदीबहिनी तथा दाजुभाइहरु,
कमरेडहरु !
निरंकुशताको अन्धकार हटाएर लोकतन्त्रको उज्यालो फैलाउने संघर्षमा नेकपा (एमाले) ले सधैं अग्रपंक्तिमा रहेर नेतृत्वदायी भूमिका खेल्यो। अनेकौं प्रहार खेपेर राष्ट्रिय स्वाधीनता जोगाउने बलियो कवच यही पार्टी बन्यो। देशभक्तिको भावना जगाउने र विकासका संरचना निर्माण गर्ने कामको नेतृत्व यही पार्टीले गर्‍यो । सामाजिक सुरक्षाका कार्यक्रम ल्याउने लोक कल्याणकारी राज्यको आरम्भ यही पार्टीले गरेको हो । समृद्ध नेपाल, सुखी नेपालीको लक्ष्य पूरा गर्न हामीले गरेका यी कामका सयौं उदाहरण छन्।
एमाले केवल एउटा राजनीतिक संगठन होइन — यो जनताको रगत, पसिना, आँसु र आशाबाट बनेको विशाल परिवार हो। यस पार्टीको जग बसाल्न तीन पुस्ताले आफ्नो जीवनका उज्याला क्षण समर्पण गरेका छन्। कसैले जेलयातना भोगे, कतिले जीवन बलिदान गरे, कसैले आफ्नो युवावस्था आन्दोलनमा अर्पण गरे, र धेरैले सानो–ठूलो योगदान गरेर यो घरलाई अड्याए ।
आज फेरि महाविनाश निम्त्याएर देशको सार्वभौम अस्तित्वमाथि चुनौती खडा गरिएको छ, लोकतान्त्रिक संविधानमाथि आक्रमण भइरहेको छ। यस्तो बेला हामी मौन रहन सक्दैनौं। राष्ट्रिय एकता, देशको स्वाभिमान, र लोकतन्त्रको रक्षाका लागि हामी सबै एकै मन, एकै स्वर र एकै दिशामा अघि बढ्नुपर्छ।
त्यसैले, विगतमा नेकपा (एमाले)को निर्माण गर्न र यसलाई बलियो बनाउने यात्रामा सँगै हिँड्नु भएका सबै नेता–कार्यकर्तालाई हृदयदेखि आह्वान गर्न चाहन्छु —
जहाँ हुनुहुन्छ, फर्किनुस् आफ्नै घर फर्किनुस्।
यो घर तपाईंहरूको पसिना र रगतले बनेको हो।
फेरि हामी सबै काँधमा काँध मिलाएर अघि बढौं — देशको स्वाधीनता जोगाऔं, लोकतन्त्रको रक्षा गरौं, र जनताको जीवनमा सुख, समृद्धि र आशाको ज्योति बालौं।
हामी एउटै परिवार हौं —
हाम्रो लक्ष्य स्पष्ट छ —
समृद्ध नेपाल, सुखी नेपाली।
म सबैमा आह्वान गर्न चाहन्छु –
कोही अलमलमा नपर्नुस्, आउनुस्, आफ्नै घरमा —
हाम्रो साझा सपना साकार पार्न ।
निर्णायक राष्ट्रिय शक्ति निर्माणमा जुटौं।