यी हुन बाढी र पहिरोका कारण आवतजावत बन्द भएका सडक

१९ असोज, काठमाडाैँ । निरन्तरको वर्षासँगै बाढी र पहिरोले देशका विभिन्न भागका राजमार्ग र सडक अबरूद्ध भएका छन। प्रहरी र सशस्त्र प्रहरीले संकलन गरेको विवरण अनुसार अहिलेसम्म अवरूद्ध रहेका सडकहरू यस प्रकार रहेका छन ।

१. भक्तपुर जिल्ला — सूर्यविनायक नगरपालिका–९ साँगास्थित झोलुङ्गेपुल नजिक पहिरो खसेकाले आवागमन बन्द भएको छ।

२. काठमाडौं जिल्ला — सीतापाइला–धार्के सडकखण्ड अन्तर्गत नागार्जुन नगरपालिका–८ ठुलो खोलामा पहिरोका कारण सवारी आवागमन रोकिएको छ।

३. ललितपुर जिल्ला — कान्तिलोकपथ अन्तर्गत बागमती गाउँपालिका–३ टाकुचे र टिकाभैरव क्षेत्रमा पहिरो खसेकाले आवतजावत अवरुद्ध भएको छ।

४. धादिङ जिल्ला — पृथ्वी राजमार्ग अन्तर्गत बेनीघाट गाउँपालिका–९ लोलाङमा खसेको पहिरोका कारण सडक पूर्णरूपमा बन्द छ।

५. चितवन जिल्ला — नारायणगढ–मुग्लिन सडकखण्ड अन्तर्गत इच्छाकामना गाउँपालिका–५ तुइन खोला पुल नजिक पहिरो खसेकाले सवारी सञ्चालन अवरुद्ध छ।

६. मकवानपुर जिल्ला — इन्द्रसरोवर गाउँपालिका–३ सिस्नेरी बजारस्थित कुलेखानी–सिस्नेरी–दक्षिणकाली–काठमाडौं सडकखण्डमा पर्ने डोडारे खोलामा बाढीका कारण सडक अवरुद्ध भएको छ। साथै, हुमाने–फाखेल सडकखण्ड पनि विभिन्न स्थानमा पहिरोका कारण बन्द छ।

७. काभ्रेपलाञ्चोक जिल्ला — वि.पी. राजमार्ग अन्तर्गत रोशी गाउँपालिका–११ माम्तीखोला र बुलढुंगामा, साथै मंगलटार खोलामा गएको बाढी र पहिरोका कारण सवारी सञ्चालन अवरुद्ध छ।

८. हेटौडा–भैसे–नौबिसे सडकखण्ड — अविरल वर्षाका कारण विभिन्न स्थानमा पहिरो खसेकाले सडक पूर्णरूपमा बन्द छ।

९. सिन्धुपाल्चोक जिल्ला — अरनिको राजमार्ग अन्तर्गत भोटेकोशी गाउँपालिका–४ चारकिलोमा सडक भासिनुका साथै धुलिखेल–खावा र ५४ किलोमा खसेका पहिरोका कारण आवागमन बन्द छ।

१०. इलाम जिल्ला — मेची करिडोर अन्तर्गत इलाम नगरपालिका–११ बेलासेमा माइखोला पुल क्षतिग्रस्त भएकाले सवारी आवागमन अवरुद्ध छ।

११. संखुवासभा जिल्ला — कोशी राजमार्ग अन्तर्गत मकालु गाउँपालिका–३ एकुवा र भोटखोला गाउँपालिका–४ बरूणमा खसेका पहिरोका कारण आज पनि सवारी सञ्चालन हुन सकेको छैन।

१२. रसुवा जिल्ला — पासाङ ल्हामु राजमार्ग अन्तर्गत गोसाइकुण्ड गाउँपालिका–२ घट्टेखोला, बालुवाखानी र तातोपानीमा पहिरोका कारण सवारी सञ्चालन बन्द छ। साथै, सोही गाउँपालिकाको रसुवागढीस्थित नेपाल–चीन सीमा जोड्ने मितेरी पुलमा गत असार २४ गते आएको बाढीले क्षति पुऱ्याएकाले हालसम्म आवागमन अवरुद्ध रहेको छ।