बेलकोटगढी नगर कमिटीको अध्यक्षमा रमेश न्याैपाने र सचिवमा हरिहर सिलवाल विजयी

१६ पुस, नुवाकोट । नेकपा एमालेको बेलकोटगढी नगरकमिटीको अध्यक्षमा रमेश न्यौपाने विजयी हुनुभएको छ । पार्टी जिल्ला उपाध्यक्ष राजेन्द्र रमण खनालका विश्वासपात्र न्यौपाने मंगलबार भएको मतदानबाट अध्यक्षमा विजयी हुनुभएको हो ।

निर्वाचन समितिका संयोजक रामकृष्ण खड्काका अनुसार न्यौपाने १३१ मतसहित विजयी हुँदा भोजप्रसाद पुडासैनीले १०४ मत प्रप्त गर्नुभयो । त्यस्तै उपाध्यक्षमा रामहरि घिमिरेले १२४ मतसहित विजयी हुँदा बद्रीप्रसाद नेपालले १११ मत प्राप्त गर्नुभयो ।

सचिवमा हरिहर सिलवालले १३२ मत प्राप्त गर्दै विजयी हुँदा वासुदेव गजुरेलले १०६ मत प्राप्त गर्नुभयो । त्यस्तै उपसचिवमा शरणकुमार खनालले १४७ मत प्राप्त गर्दै विजयी हुँदा धर्मराज पुडासैनीले ८२ मत प्राप्त गर्नुभयो । यस्तै उपसचिव महिलामा सनिता श्रेष्ठले ११५ मत प्राप्त  गर्दै विजयी हुँदा रिता सुवेदीले १०७ मत प्राप्त गर्नुभयो । यस्तै लेखा कमिटीको सचिवमा केदारप्रसाद अधिकारी १३५ मतसहित विजयी हुनुभयो भने केदारप्रसाद पनेरूले ९३ मत प्राप्त गर्नुभयो ।

एमाले भित्रको दश बुँदे पक्षधर अर्थात नारायण खतिवडा निकटका नेताहरूले एउटा प्यानल बनाएका थिए भने पार्टीको जिल्ला अध्यक्ष बद्री मैनाली निकटका नेताहरूले अर्को प्यानल बनाएका थिए । प्यानलकै बीचमा प्रतिस्पर्धा हुँदा १० बुँदे समूहका उम्मेदवारहरू सबै पराजित हुन पुगेका छन ।

अधिवेशनको यही पुस १३ गते नेकपा एमालेका सचिव योगेश भट्टराईले उद्घाटन गर्नुभएको थियो । अधिवेशन उद्घाटनको दुई दिनसम्म केही नगरी चाैँथो दिनको दिनमात्रै मतदान गरिएको थियो । बन्दसत्र लगत्तै मतदान गर्दा नतिजा फरक हुने भएपछि सबै चाँजोपाँजो मिलाएर चाैँथो दिन मंगलबार मतदान गरिएको थियो ।