एनपीएल उपाधि भिडन्त हेर्न टीयू ग्राउन्डमा दर्शकको भरिभराउ
६ पुस, काठमाडौं । टीयू क्रिकेट मैदानमा जारी नेपाल प्रिमियर लिग (एनपीएल)को आज फाइनल भइरहेको छ । फाइनलमा सुदूरपश्चिम रोयल्स र जनकपुर बोल्टस्बिच भिडन्त भइरहेको हो ।
कीर्तिपुरस्थित त्रिभुवन विश्वविद्यालय क्रिकेट मैदानमा टस जितेर सुदूरपश्चिमका कप्तान दीपेन्द्रसिंह ऐरीले जनकपुरलाई पहिले बलिङको निम्तो दिएका थिए । स्थानीय समयअनुसार खेल दिउँसो १२ः३० बजेदेखि सुरु भएको हो ।
शनिबार एनपिइलको फाइनल खेल हेर्न बिहानैदेखि खेल मैदानमा दर्शक भरिभराउ छन् । दुवैतर्फका टिम समर्थक आआफ्ना टिमको समर्थनमा प्लेकार्ड सहित उपस्थित भएका छन् ।
नेपाली क्रिकेट इतिहासकै सबैभन्दा ठूलो फ्रेन्चाइज प्रतियोगिताको उपाधि कसले जित्ला भन्ने कौतूहल त छ नै त्यतिकै मात्रामा फाइनल हेर्न दर्शक समेत उत्साहित देखिन्छन् । प्रतियोगितामा विभिन्न ८ फ्रेन्चाइज टोली सहभागी थिए । जसमध्ये सुदूरपश्चिम र जनकपुर बोल्टस्ले फाइनल यात्रा तय गरेका हुन् ।
प्रकाशित मिति : ६ पुष २०८१, शनिबार १३:३३
