वरिष्ठ पर्यटन व्यवसायी देवेन्द्र वाग्लेको निधन
२५ कात्तिक, काठमाडौँ । वरिष्ठ पर्यटन व्यवसायी देवेन्द्र वाग्लेको निधन भएको छ । तत्कालीन नेपाल पर्यटन व्यवसायी सङ्घ (निट) नेपालका महासचिवसमेत रहनुभएका ५५ वर्षीय वाग्लेको आज साँझ ह्याम्स अस्पतालमा उपचारका क्रममा निधन भएको पर्यटन व्यवसायी सिएन पाण्डेले जानकारी दिनुभयो ।
अकस्मात कलेजोको समस्या देखिएपछि वाग्लेलाई कात्तिक १९ गते उक्त अस्पतालमा भर्ना गरिएको थियो । नेपाली कांग्रेस गोरखाका महाधिवेशन प्रतिनिधिसमेत रहनुभएका वाग्लेले काठमाडौँको प्रमुख पर्यटकीय गन्तव्य ठमेलमा होटल, ट्राभल, टुर्सलगायत व्यवसाय सञ्चालन गर्दै आउनुभएको थियो ।
उहाँले जलविद्युत्, बीमा, बैङ्कलगायतमा समेत लगानी गर्नुभएको थियो । वाग्लेको सोमबार बिहान पशुपतिस्थित आर्यघाटमा अन्त्येष्टि गरिने उहाँको परिवारिक स्रोतले जनाएको छ ।
प्रकाशित मिति : २५ कार्तिक २०८१, आईतवार २२:११
