सुतिरहेका गाउँपालिकाकाे अध्यक्ष अाेछ्यानमै कुटिए
२६ मंसिर, रुकुम । मदिरा सेवन गरेका युवाहरुले घरमै सुतिरहेका बेला बाँफिकोट गाउँपालिकाकाअध्यक्ष धर्मबहादुर केसीमाथि ढुङ्गा प्रहार गर्दा घाइते हुनुभएको छ । मंगलबार राति साढे ८ बजे अध्यक्ष केसीमाथि केही युवाहरुले आक्रमण गरेका हुन् ।
युवाहरूले अध्यक्ष केसीको घरबाहिर राखिएका भाँडाकुँडा तोडफोड गर्दा सुतिरहेका अध्यक्षले घर बाहिर आएर त्यसो नगर्न आग्रह गर्दा उनीमाथि आक्रमण भएको प्रारम्भिक अनुसन्धानबाट खुलेको जिल्ला प्रहरी कार्यालयका प्रमुख प्रहरी नायव उपरीक्षक सुमित खड्काले बताउनुभयो ।
गाउँपालिकाको वडा नम्बर ४ मा अध्यक्षमाथि विवाहबाट फर्किरहेका युवाले ढुङ्गा प्रहार भएकाे प्रहरीले जनाएको छ । कुटपिटपछि अध्यक्ष केसीको टाउकोमा ३ वटा टाँका लगाइएको छ भने अनुहारमा पनि चोट लागेको छ । घटनापश्चात् बाँफिकोट स्वास्थ्य चौकीमा राति नै उपचार गराएर अध्यक्ष केसी घर फर्किनु भएको थियो ।
घटनामा संलग्न ७ जनालाई नियन्त्रणमा लिइएको डीएसपी खड्काले जानकारी दिएका छन् । अत्याधिक मदिरा सेवन गरेका युवाहरुले घरमै बसेका अध्यक्षमाथि बिना कारण कुटपिट गरेको प्रहरीले बताएको छ ।
प्रकाशित मिति : २६ मंसिर २०७५, बुधबार ११:०९
