दैनिकी

प्रधानमन्त्री ओलीले संसदको दुईतिहाई सदस्यको विश्वास पाए, पक्षमा १८८ मत

६ असोज, काठमाडौँ । प्रधानमन्त्री केपी शर्मा ओलीले संसदको दुईतिहाई सदस्यको विश्वास प्राप्त गरेका छन । आइतबार प्रतिनिधिसभाको बैठकमा प्रधानमन्त्री ओलीले मागेको विश्वासको पक्षमा १८८ मत प्राप्त भएको छ । त्यस्तै विपक्षमा ७४ मत परेको छ भने तटस्थमा १ मत प्राप्त भएको छ । योसँगै केपी शर्मा ओलीको सरकार परिपक्क बनेको छ ।

प्रधानमन्त्री ओलीद्वारा नेपालको संविधान २०७२ को धारा ७६ को उपधारा (४) बमोजिम प्रतिनिधिसभाबाट विश्वास प्राप्त गर्न प्रतिनिधिसभा नियमावली, २०७९ को नियम १५५ बमोजिम राखेको प्रस्ताव बैठकले बहुमतले पारित गरेको हो । बैठकमा भएको मतदानको परिणाम घोषणा गर्दै सभामुख देवराज घिमिरेले सभामा तत्काल कायम रहेको सङ्ख्याको बहुमतले सो प्रस्ताव स्वीकृत भएको जानकारी दिए ।

मतदानमा कुल दुई सय ६३ सदस्यले भाग लिएकामा प्रधानमन्त्रीले राखेको विश्वासको मतको प्रस्तावका पक्षमा नेपाली कांग्रेस, नेपाल कम्युनिष्ट पार्टी (एमाले)लगायतका राजनीतिक दल सम्वद्ध सांसदको गरी कूल १८८ मत परेको थियो भने विपक्षमा नेपाल कम्युनिष्ट पार्टी (माओवादी केन्द्र), राष्ट्रिय स्वतन्त्र पार्टी, राष्ट्रिय प्रजातन्त्र पार्टी, नेपाल कम्युनिष्ट पार्टी (एकीकृत समाजवादी) पार्टीलगायतका दलका गरी ७४ मत परेको छ । प्रधानमन्त्रीले प्राप्त गरेको उक्त मत संसदमा रहेका कूल सदस्यको दुई तिहाइ हो ।

मतदानमा एक सदस्य तटस्थ रहेका छन । गत असार २८ गते एमालेका अध्यक्ष ओली प्रधानमन्त्रीमा नियुक्त भएका थिए । गत असार १७ गते कांग्रेस र एमालेबीच सात बुँदे सहमति भएको थियो ।