ओलीले सरकार बनाउने, यस्तो छ रामेश्वर थापाको घरमा भएको भागवण्डाको सहमति

१८ असार, काठमाडौँ । नेकपा एमालेका अध्यक्ष केपी शर्मा ओलीले नेपाली कांग्रेससहितका दलको समर्थनमा दुई तिहाइ बहुमतसहितको नयाँ सरकार गठन गर्ने भएका छन । सोमबार मध्यरातमा मिडिया उद्यमी समेत रहेका व्यवसायी रामेश्वर थापाको घरमा बसेर एमाले अध्यक्ष ओली र कांग्रेस सभापति शेरबहादुर देउवाले नयाँ सत्ता सहकार्यका सन्दर्भको सहमतिमा हस्ताक्षर गरेका छन ।

रामेश्वर थापाको घरको पहिलो तल्लाको बैठक कोठाको सोफामा बसेर ओली र देउवाले सत्ता सहकार्यसहित संविधान संशोधनसम्मको मार्ग निर्देश गर्ने सहमति पत्रमा हस्ताक्षर गरेका छन । उनीहरूले मध्यराति १२ बजेपछि सहमति पत्रमा हस्ताक्षर गरेका थिए । थापा तीनै व्यक्ति हुन जसले प्रधानमन्त्री पुष्पकमल दाहाल प्रचण्ड र केपी शर्मा ओलीलाई एकै ठाउँमा ल्याउने भूमिका खेलेका थिए ।

मध्यरातमा भएको सहमतिमा पालैपालो सरकारको नेतृत्व गर्ने उल्लेख गरिएको छ । जसअनुसार सुरुको डेढ वर्ष एमाले अध्यक्ष ओलीले सरकारको नेतृत्व गर्ने छन्  भने अर्को डेढ वर्ष देउवाले सरकारको नेतृत्व गर्नेछन । दुई दलबीच भएको सहमतिअनुसार एमालेले अर्थसहित ९ वटा मन्त्रालय र कांग्रेसले गृहमन्त्रीसहित १० वटा मन्त्रालय लिएर सरकारमा काम गर्नेछन ।

नेताहरूले प्रदेश सरकारमा समेत भागवण्डा गर्ने सहमति भएको छ । दुई दलको सहमति अनुसार कोसी, लुम्बिनी र कर्णालीमा एमालेले सरकारको नेतृत्व गर्नेछ भने कांग्रेसले बागमती, गण्डकी र सुदूरपश्चिममा सरकारको नेतृत्व गर्नेछ । मधेश प्रदेशमा भने जनमत वा जसपाले सरकारको नेतृत्व पाउने सहमति भएको छ ।

कांग्रेस र एमालेको सहमतिका लागि पछिल्लो २४ घण्टा एमालेबाट शंकर पोखरेल, प्रदीप ज्ञवाली र रमेश बडालले काम गरे भने कांग्रेसबाट रमेश लेखक, आरजु राणा र ज्ञानेन्द्रबहादुर कार्कीले काम गरे ।

परमादेश पीडितले न्याय पाए, योजनाकारका लागि रोजगारी

पूर्व प्रधानन्याधीश कल्याण श्रेष्ठको योजनामा तयार भएको सर्वोच्चको तत्कालीन परमादेशले प्रधानमन्त्रीबाट पदमुक्त भएका केपी शर्मा ओली र परमादेशले नै प्रधानमन्त्री नियुक्त भएका शेरबहादुर देउवालाई यो सहमतिले एकै ठाउँमा ल्याएको छ ।

देउवा लगायतले परमादेशका लागि चुक्ता गर्न बाँकी रहेको मूल्य समेत यो सहमतिले नै तिर्ने भएको छ । त्यसका लागि संविधान संशोधनका लागि सुझाव आयोग बनाउने र त्यसको अध्यक्षमा श्रेष्ठलाई नियुक्ति दिने विषयमा पनि ओली र देउवा एक मत भएका छन ।

श्रेष्ठलाई यसअघि देउवा र प्रचण्डले मिलेर राष्ट्रपति बनाउने प्रयास गरेको भए पनि अन्तिम समयमा त्यो सफल भएको थिएन । ओली र देउवाकै सहमतिले श्रेष्ठकै प्रतिनिधिको रूपमा निर्वाचन आयोगमा नुवाकोटका कृष्णमान प्रधानलाई नियुक्तिका लागि सिाफरिस गरिसकिएको छ । हुनत नयाँ गठबन्धन बनाउनका लागि एमालेका रमेश बडाल र श्रेष्ठको भूमिका अझै महत्वपूर्ण रहेको राजनीतिक बृत्तमा चर्चा छ ।