हिमालयन रि इन्स्योरेन्सको आईपीओ बाँडफाँड आज, सबैले १० कित्ता सेयर पाउने

११ पुस, काठमाडाैं । हिमालयन रिइन्स्योरेन्सको आईपीओ आज पुस ११ गते बुधबार बाँडफाँड हुने भएको छ । बिक्री प्रबन्धक एनएमबि क्यापिटलका अनुसार कम्पनीकाे आईपीओ आज बिहान १० बजे काठमाडौंको बालुवाटारको शुवर्ण शमशेर मार्गमा अवस्थित ताज रिसेप्सनमा बाँडफाँड हुनेछ ।

कम्पनीले मंसिर २७ गतेदेखि पुस २ गतेसम्म सर्वसाधारणलाई प्रिमियम मूल्यमा आईपीओ निष्काशन गरेकाे थियाे । कम्पनीकाे आईपीओमा अन्तिम दिनसम्ममा १.३ गुणा आवेदन परेको छ ।सिडिएस एण्ड क्लियरिङ्गका अनुसार १६ लाख ६० हजार २२ जना आवेदकले ३ करोड २२ लाख १५ हजार कित्ता सेयरको लागि आवेदन दिएका छन् । यस हिसावले हेर्दा आईपीओ भर्ने सबैले १० कित्ताका दरले सेयर पाउने र केहि आवेदकले २० कित्ताका दरले थप सेयर पाउने भएका छन् ।

कम्पनीले प्रतिसेयर १०० रुपैयाँ अंकित दरमा १०६ रुपैयाँ प्रिमियम जोडेर प्रतिसेयर २०६ रुपैयाँको दरले २ करोड ४९ लाख कित्ता आईपीओ सर्वसाधारणका लागि बिक्री खुलाएको थियो ।