सांसद महतोलाई पक्राउ गर्न प्रहरीले संसद सचिवालयलाई लेख्याे पत्र

१८ वैशाख, काठमाडौं । नेकपा एमालेका सांसद लक्ष्मी महतो कोइरीलाई पक्राउ गर्न प्रहरी प्रधान कार्यालयले दोस्रो पटक सभामुखलाई सम्बोधन गरेर संघीय संसद सचिवालयलाई पत्र लेखेको छ ।

आइतवार फरार कोइरीलाई पक्राउ गर्नका लागि सभामुखलाई जानकारी गराएको प्रहरी प्रधान कार्यालयका केन्द्रीय प्रहरी प्रवक्ता प्रहरी नायव महानिरीक्षक कुबेर कडायतले जानकारी दिए । ‘सांसद कोइरीलाई पुर्पक्षमा राखेर कारबाही गर्नु भन्ने अदालतको आदेश छ । त्यो जानकारी राखेर सभामुखलाई हामीले पत्राचार गरेका हौं ।’कडायतले भने ।

यसअघि गत पुष ७ गते सांसद कोइरी फरार रहेको भनी प्रहरी प्रधान कार्यालयले संसद सचिवालयका महासचिवलाई सम्बोधन गरेर पत्र पठाएको थियो । ‘‘निज लक्ष्मी महतो सम्मानित महोत्तरी जिल्ला अदालत जलेश्वरमा हालसम्म पनि हाजिर हुन नआई फरार रहेको व्यहोरा जानकारीका लागि सादर अनुरोध गरिएको भनी जिल्ला प्रहरी कार्यालय महोत्तरीको च. नं ३६१५ मिति २०७९/०९/०७ गतेको पत्र प्राप्त भएको हुँदा २०७७/०८/१९ गते सम्मानि तउच्च अदालत जनकपुरबाट भएको आदेश कार्यान्वयन गर्ने सम्बन्धमा आवश्यक सहयोग गरि दिने व्यवस्था हुन सादर अनुरोध गरिएको छ’ डीआईजी रोक प्रसाद राईले संघीय संसद सचिवालयलाई लेखेको पत्रमा उल्लेख गरिएको छ ।

कोइरीलाई पक्राउ गर्न २०७७ साल मंसिर १९ गते उच्च अदालत जनकपुरले पक्राउ गर्न आदेश दिएको थियो । कोइरी गत मंसिर चार गतेको आम निर्वाचनमा महोत्तरी क्षेत्र नम्बर १ बाट प्रतिनिधि सभा सदस्यमा निर्वाचित भएका थिए। उनलाई २०७२ साल भदौ पाँच गते थमन बिकलाई घेरा हालेर कुटपिट गरी हत्या गरेको अभियोग पुष्टि भएपछि अदालतले कारबाही गर्न आदेश दिएको थियो ।