नुवाकोटका शिक्षक पण्डितको हत्या अारोपमा चार जना पक्राउ

१४ असोज, काठमाडाैँ । नुवाकोटको दुप्चेश्वर गाउँपालिका –६ का शिक्षक ५० वर्षीय गणेशबहादुर पण्डितको हत्या गरेको आरोपमा प्रहरीले आज चार जनालाई पक्राउ गरेको छ ।

शिक्षक पण्डितको शव शुक्रबार बेलुका स्थानीय बासबोटे जङ्गलमा भीरबाट लडेर शंकास्पद अवस्थामा फेला परेपछि प्रहरीले तिनलाई पक्राउ गरी अनुसन्धान शुरु गरेको प्रहरी उपरिक्षक बसन्त कुँबरले जानकारी दिए । नवज्योति आधारभूत विद्यालयका प्रधानाध्यापक समेत रहेका पण्डितको शब घर नजीकैको भीरमा भेटिएको थियो ।

पक्राउ पर्नेमा २४ वर्षीय सुरजन तामाङ, ३१ वर्षीय राजकुमार तामाङ, ३६ वर्षीय दीपबहादुर तामाङ र १९ वर्षीय महेन्द्र तामाङ छन् । अभियुक्तविरुद्ध आज नै कर्तव्य ज्यान मुद्दा दायर गरी अनुसन्धान थालिएको प्रहरीले जनाएको छ । यसैबीच नेपाल राष्ट्रिय शिक्षक संगठनका सचिव राजेन्द्र दवाडीले शिक्षक पण्डितको हत्याको छानविन गर्न माग गरेको छ । उनले सत्य तथ्य पहिचान गरि दोषीलाई कानुनी कठघरामा ल्याउन माग गरेका छन । उनले हत्याको अनुसन्धानमा सहयोग गर्न अाग्रह समेत गरेका छन ।