मनाङमा दुई महिनादेखि यातायात अवरुद्ध, खाद्यान्नका लागि हेलिकाेप्टरकाे भर
१८ भदौ, लमजुङ । १ असारको बाढीपहिरोले सडक क्षतविक्षत बनाएपछि हिमाली जिल्ला मनाङमा खाद्य संकट भएको छ । दुई महिना बढी समयदेखि यातायात अवरुद्ध मनाङमा खाद्यान्न लगायत ढुवानी नभएपछि जनजीवन नराम्ररी प्रभावित भएको छ । दुई महिना बढी समयदेखि मनाङमा खाद्यन्न हेलिकप्टरमार्फत पुर्याइएको छ । यातायात बन्द भएपछि मनाङमा खाद्यान्न लगायतका दैनिक उपभोग्य सामग्री लैजान पनि हेलिकाेप्टरकै भर पर्नुपर्ने मनाङवासीको बाध्यता छ ।
मनाङमा बाढीले क्षतविक्षत बनाएको सडक निर्माण हुन समय लाग्ने भएपछि माथिल्लो मनाङमा खाद्यान्न संकट झन बढ्ने चिन्ता बढेको पर्यटन व्यवसायी विनोद गुरुङले बताए । माथिल्लो क्षेत्र मनाङ ङिस्याङ गाउँपालिकाका विभिन्न गाउँमा कामका लागि पुगेका मजदुरले उपभोग्य वस्तु किन्न पाएका छैनन् । दैनिक उपभोग्य वस्तु अभाव भएको र चामे हुँदै ढुवानी सम्भव नभएपछि माथिल्लो क्षेत्रका वासिन्दाले मुस्ताङ हुँदै थोराङला भञ्ज्याङ पास गराएर आवश्यक वस्तु ढुवानी गरेको गुरुङले बताए ।
थोराङला भञ्ज्याङ पार गराएर खच्चडमार्फत उपभोग्य वस्तु ढुवानी गरिएको छ । मुस्ताङबाट दुईदिनमा खाद्यान्न खच्चडमार्फत टंकी मनाङसम्म झार्न सकिन्छ । हेलिकप्टरको ढुवानी महँगो हुने भएकोले पनि मुस्ताङको बाटो हुँदै खच्चडमार्फत खाद्यन्न ढुवानी गरिएको हो ।
मनाङका प्रमुख जिल्ला अधिकारी विष्णु लामिछानेका अनुसार सडक अवरुद्ध हुँदा माथिल्लो मनाङमा हेलिकप्टरको माध्यमबाट खाद्यन्न ढुवानी गरिए पनि पर्याप्त मात्रमा नहुँदा स्थानीयले मुस्ताङबाट खच्चडमार्फत खाद्यन्न ल्याइएको बताए । सरकारले मनाङ जिल्लालाई विपत संकटग्रस्त क्षेत्र घोषणा गरेको छ ।
प्रकाशित मिति : १८ भाद्र २०७८, शुक्रबार ११:१२
