१७ वर्षीया गर्भवती बेचनी कुमारी साहको हत्या

१ असार,राजविराज । सप्तरीको राजविराज नगरपालिका १५ मा १७ वर्षीया गर्भवती बेचनी कुमारी साहको हत्या भएको छ ।गर्भवती साहको करीब ४ र ५ दिनअघि नै हत्या गरी ट्वाइलेटको रिङले छोपिएको अवस्थामा आज शव फेला परेको प्रहरी नायब उपरीक्षक भोवेश रिमालले बताउनुभयो । हत्या गरी फालिएको अवस्थामा शव कुहिएर दुर्गन्ध फैलिएपछि घटनाबारे खुलासा भएको जिल्ला प्रहरी कार्यालय सप्तरीले जनाएको छ । गाउँमै दुर्गन्ध फैलिएपछि खोजी गर्ने क्रममा ट्वाइलेटको रिङले छोपिएको अवस्थामा शव भेटिएको हो ।

प्रहरीले घटनास्थलको मुचुल्का तयार गरी शवपरीक्षणका लागि राजविराजस्थित गजेन्द्रनारायण सिंह सगरमाथा अञ्चल अस्पताल राखेको छ । मृतकका पति ३५ वर्षीय सुजकुमार साह डेढ वर्षीया छोरी प्रतिमालाई लिएर बेपत्ता भएका छन् । घटनाबारे थप अनुसन्धान भइसकेको प्रहरी नायब उपरीक्षक रिमालले बताउनुभयो । पतिले नै हत्या गरेको मृतक बेचनीको माइती पक्षले आरोप लगाएका छन् ।

यसअघि दुई दिनअगाडि पनि राजविराज नगरपालिका–९ स्थित मलेठमा ससुराली आएका एक युवकको ससुरा, जेठान र श्रीमतीले कुटपिट गरी हत्या गरेका थिए ।