सुन काण्डका मुख्य अभियुक्त गोरे जेल चलान
१३ जेठ, विराटनगर । साढे ३३ किलोसहितको ३८ क्विन्टल सुन तस्करी र मोरङका सनम शाक्य हत्याकाण्डका मुख्य अभियुक्त गोरे भनिने चूडामणि उप्रेती पुर्पक्षका लागि जेल चलान भएका छन् ।
गत मंगलवार काठमाडौंबाट पक्राउ परेका गोरेलाई जिल्ला अदालत मोरङले आइतवार मुद्दाको पुर्पक्षका लागि जेल चलान गरेको हो । गत बुधवारबाट अदालतमा बयान लिन शुरु भएको थियो । आइतवार बयान सकिएसँगै भएको थुनछेक बहसपछि गोरेलाई जेल चलान गर्ने आदेश भएको हो ।
जिल्ला अदालत मोरङका न्यायाधीश नारायण प्रसाद शर्माको इजलाशले गोरेलाई जेल चलान गर्ने आदेश दिएको हो ।
गोरेसँगै सुन तस्करी र सनम शाक्य हत्याकाण्डमा पुर्पक्षका लागि जेल चलान हुने संख्या २९ पुगेको छ ।
यसअघि गत मंगलवार (जेठ ८ गते) जिल्ला अदालत मोरङले सुन काण्ड र सनम हत्यासँग जोडिएका २८ अभियुक्तलाई पुर्पक्षका लागि जेल चलान गरेको थियो ।
प्रकाशित मिति : १३ जेष्ठ २०७५, आईतवार २०:२६
