प्रदेशको विकास र समृद्धिका लागि आगामी बजेटमा पर्यटनलाई प्राथमिकता दिनेछाैँः मन्त्री गुरुङ

७ जेठ, चिप्लेढुङ्गा । गण्डकी प्रदेशका आर्थिक मामिला तथा योजना मन्त्री किरण गुरुङले पर्यटन क्षेत्रलाई प्राथमिकतामा राखिने बताउनुभएको छ । ट्रेकिङ एजेन्सिज एशोसिएसन अफ नेपाल (टान) क्षेत्रीय कार्यालयले ‘आगामी बजेटमा पर्यटन विकासका लागि प्रस्तावित कार्यक्रम’ सम्बन्धी छलफलमा उहाँले भन्नुभयो, “प्रदेशको विकास र समृद्धिका लागि आगामी बजेटमा पर्यटन क्षेत्रलाई प्राथमिकतामा राखिनेछ ।”

मन्त्री गुरुङले पर्यटन क्षेत्रमा प्रत्यक्ष रुपमा थोरै देखिए पनि अप्रत्यक्षरुपमा योसँग जोडिने पूर्वाधार विकासमा बजेट बढिरहेको बताउँदै कोरोना महामारीबाट सङ्कटमा रहेको आर्थिक गतिविधिलाई चलायमान बनाउनका लागि विशेष जोड दिइनेछ भन्नुभयो । उहाँले भन्नुभयो, “पर्यटन व्यवसायी समस्यामा हुनुहुन्छ, आर्थिक चलायमान नहुँदा निजी क्षेत्रलगायत सबैको अवस्था उस्तै छ, यसले राज्यको ढुकुटीमा समेत प्रत्यक्ष असर पारेको छ । अब आर्थिक लकडाउन हुन दिनुहुँदैन, यसबारेमा हामी सोच्नेछौँ ।”

टानका पूर्वअध्यक्ष टीकाराम सापकोटाले पदयात्रा र पर्वतारोहणबाट नेपालको पर्यटन शुरु भएको स्मरण गर्दै यस क्षेत्रको विकास र विस्तारमा प्रदेश सरकारले विशेष चासो दिनुपर्ने बताउनुभयो । पर्यटन वर्ष घोषणा भएपछि धेरै लगानी पर्यटन क्षेत्रमा भएको तर सङ्कटको अवस्थामा त्यसको संरक्षणका बारेमा सम्बोधन हुन नसकेको उहाँको भनाइ थियो ।

टानका अध्यक्ष हरि भुजेलले गण्डकी प्रदेशको पर्यटनको प्रमुख आधार नै पदयात्रा र हिमाल आरोहण भएकाले यस क्षेत्रको विकासमा प्रदेश सरकारबाटै विशेष नीति तथा योजना आउनुपर्नेमा जोड दिनुभयो । उहाँले गण्डकी प्रदेशमा आठ हजारभन्दा अग्ला तीनवटा हिमाल भएको जानकारी दिँदै सगरमाथा चढ्नुअघि मर्दी टेन पिक अनिर्वाय चढ्नुपर्ने बाध्यकारी नियम बनाउन सके यस क्षेत्रको पर्यटन गतिविधि बढ्ने विश्वास व्यक्त गर्नुभयो ।

सङ्घका प्रथम उपाध्यक्ष सुशीलराज पौडेल र सहसचिव उदय सुवेदी र कोषाध्यक्ष कृष्ण आचार्यले सन् २०२१ लाई पूर्वाधार विकासको वर्ष घोषणा गर्नुपर्नेमा जोड दिनुभयो । उहाँहरुले पर्यटकको सुरक्षाका लागि आगामी योजनामा छुमरुङमा एउटा आकस्मिक रेस्क्यू टिम राख्न प्रदेश सरकारलाई सुझाव दिनुभयो ।