अन्तर्राष्ट्रियस्तरको प्राणी उद्यान बन्दै
७ माघ, भक्तपुर । भक्तपुरको सूर्यविनायकमा निर्माणाधीन राष्ट्रिय प्राणी उद्यानलाई अन्तर्राष्ट्रियस्तरको जैविक अध्ययन केन्द्र बनाइने भएको छ । नेपालमा त्यस्तो जैविक अध्ययन केन्द्र अहिलेसम्म निर्माण भएको छैन ।
अन्तर्राष्ट्रियस्तरमा भने भारतको चण्डीगढमा यस्तै प्रकृतिको प्राणी उद्यान निर्माण भएको छ । उद्यानमा आउने अवलोकनकर्ताले नेपालमा पाइने सबै जनावर र चराचुरुङ्गीको एकै स्थानमा बसेर सजिलै अध्ययन र अवलोकन गर्न सकिने गरी उद्यानको गुरुयोजना निर्माण गरिएको छ । उद्यानमा नेपालमा पाइने सबै प्रजातिका जनावर बाघ, गैँडा, हात्ती, चित्तल, मृग, नीलगाई, चौरीगाई, गोही, झारल, हुँडार, हाब्रे, बाँदर, अजिङ्गरलगायत सबै प्रजातिका चरा राखिने खबर गोरखापत्र दैनिकमा छ ।
उक्त जनावर र चराचुरुङ्गीको सहजै अवलोकन र अध्ययन गर्न सकिने गरी प्राणी उद्यान निर्माण गर्न लागिएको हो । सूर्यविनायक नगरपालिकाको वडा ६, ७ र ८ क्षेत्रको २४५ हेक्टरमा प्राणी उद्यान निर्माण हुन लागेको हो । त्रिभुवन विश्वविद्यालय वन विज्ञान अध्ययन संस्थानका सहायक डिन जीवनाथ पाण्डेले प्राणी उद्यान क्षेत्रमा सातवटा क्षेत्र (जोन) निर्माण गरिने र जनावरको स्वभावअनुसार उक्त क्षेत्रमा राखिने गरी गुरुयोजना निर्माण गरिएको जानकारी दिए ।
गुरुयोजना स्वीकृतिमा ढिलाइ
राष्ट्रिय प्राणी उद्यानले गुरुयोजना स्वीकृतिका लागि वन मन्त्रालयमा २०७५ साउनमा पठाए पनि मन्त्रालयले अहिलेसम्म स्वीकृत गरेको छैन । गुरुयोजना निर्माण नहुँदा प्राणी उद्यान विस्तृत परियोजना प्रस्ताव (डीपीआर) निर्माण कार्य अगाडि बढ्न नसकेको राष्ट्रिय प्राणी उद्यानको कार्यालयले जनाएको छ ।
राष्ट्रिय प्राणी उद्यानको कार्यालयका निर्देशक वेदकुमार ढकालले प्राणी उद्यानको गुरुयोजना र प्रारम्भिक वातावरणीय परीक्षण प्रतिवेदन वन मन्त्रालयले एकैपटक स्वीकृत गर्ने गरी तयारी भएको बताए ।
छिटो बन्नुपर्छ प्राणी उद्यान
नेपालकै नमुनाका रूपमा निर्माण हुन लागेको राष्ट्रिय प्राणी उद्यान निर्माण कार्यको गुरुयोजना वन तथा वातावरण मन्त्रालयले चाँडै स्वीकृत गर्नुपर्ने स्थानीय तहका जनप्रतिनिधिले बताएका छन् । २०७१ सालमा सरकारले सूर्यविनायक क्षेत्रमा निर्माण गर्ने घोषणा गरेको प्राणी उद्यानको गुरुयोजना अहिलेसम्म पनि मन्त्रालयले स्वीकृत नगरेकाले छिटो स्वीकृत गर्न सूर्यविनायक नगरपालिकाले मन्त्रालयलाई आग्रह गरेको छ ।
सूर्यविनायक नगरपालिका ७ का वडाध्यक्ष रवीन्द्र सापकोटाले केन्द्रीयस्तरको प्राणी उद्यानलाई वन मन्त्रालयले प्रदेशस्तरको बनाउन खोजेको, प्राणी उद्यान कार्यालयमा सहसचिवस्तरको कार्यालय प्रमुखको दरबन्दी रहने भनिए पनि अहिले उपसचिवस्तरको दरबन्दी राखेर मन्त्रालयले प्राणी उद्यानलाई कमजोर बनाउन खोजेको बताए ।
सार्ने होइन सदर चिडियाखाना
ललितपुरको जावलाखेलमा रहेको सदर चिडियाखाना सूर्यविनायकमा निर्माणाधीन राष्ट्रिय प्राणी उद्यानमा सारिने छैन । कतिपयले भने सदर चिडियाखानै सूर्यविनायकमा सार्ने हो कि भन्ने अन्योल भए पनि सदर चिडियाखाना सूर्यविनायकमा नसारिने राष्ट्रिय प्राणी उद्यानले स्पष्ट पारेको छ ।
प्रकाशित मिति : ७ माघ २०७६, मंगलवार ०६:०८
