आकाश झैँ छाती बनाउ भन्नुहुन्छ आमा (गजल)
–सीता शर्मा
देश दुख्दा मलम लगाउ भन्नुहुन्छ आमा ।
सभ्यताको दियो जलाउ भन्नुहुन्छ आमा ।
हेर्नुहुन्न टुलुटुलु मिचिएका सिमारेखाहरु
देशले मागे रगत चढाउ भन्नुहुन्छ आमा ।
हेप्छन् नि छिमेकीले हामी कमजोर हुदा
आपसमा रिसराग हटाउ भन्नुहुन्छ आमा ।
मधेसी,हिमाली,पहाडी सबै हामी नेपाली
आकाश झैँ छाती बनाउ भन्नुहुन्छ आमा ।
कहाँ रहन्छ हाम्रो अस्तित्व, देश नै नरहे
देशको अस्मिता बचाउ भन्नुहुन्छ आमा ।
जैमिनी न. पा ५ बाग्लुडं
हाल दाङ ।
प्रकाशित मिति : २८ चैत्र २०७४, बुधबार १६:४५
