दैनिकी

नुवाकोट क्याम्पसमा अभिभावकको कोटामा गैर अभिभावक सञ्चालक, किन हुँदैन कारबाही ?

२७ चैत, नुवाकोट । नुवाकोटको पुरानो नुवाकोट अदार्श बहुमुखी क्याम्पसमा भएका अनियमितताको समाचार बाहिर सार्वजनिक भैरहेको समयमा अभिभावकको कोटामा गैर अभिभावक सञ्चालक समितिको सदस्य रहेको खुलासा भएको छ ।

क्याम्पसको सञ्चालक समितिमा दुई जना अभिभावको तर्फबाट प्रतिनिधित्व गर्ने सञ्चालक नै गैर अभिभावक रहेको तथ्य दैनिकीले फेला पारेको छ । क्याम्पसमा अभिभावकको तर्फबाट प्रतिनिधित्व गर्ने शिव चित्रकार र शुभद्रा नेपाल गैरअभिभावक रहेको खुलासा भएको छ ।

चरम राजनीतिक हस्तक्षेपले अस्तव्यस्त बनेको क्याम्पसमा अभिभावकको कोटामा राजनीति गर्ने गरी गैरअभिभावकलाई प्रवेश गराइएपछि विद्यार्थी संगठनले आन्दोलन गर्दै आएका थिए । विद्यार्थी आन्दोलन र क्याम्पसका संस्थापक बसन्तलाल श्रेष्ठको अनशनपछि माग पूरा गराउन गठित छानविन समितिले समेत अभिभावकको कोटामा गैरअभिभावकलाई सञ्चालक बनाएको विषय उजागर गरेको छ ।

नियम विपरित रहेका त्यस्ता अभिवाकको विषयमा क्याम्पस सञ्चालक समितिका अध्यक्ष श्रीराम श्रेष्ठलाई प्रश्न गर्दा आफू भन्दा अघिदेखि नै रहेका सञ्चालकहरु भएको भन्दै पन्छिने कोशिश गरे । उनले कुन सञ्चालक अभिभावक हो वा होइन भन्ने विषयमा छानविन गर्न सकिने तर अहिले नै आफूले केही भन्न नसक्ने बताए ।