सर्त बुझेर मात्र क्रेडिट कार्ड प्रयोग गर्न राष्ट्र बैंकको आग्रह

३० असार, काठमाडौं । नेपाल राष्ट्र बैंकले सर्त बुझेर मात्र क्रेडिट कार्ड प्रयोग गर्न आग्रह गरेको छ । वित्तीय समावेशिता तथा ग्राहक संरक्षण महाशाखाले एक सूचना जारी गर्दै सर्त बुझेर मात्र क्रेडिट कार्ड प्रयोग गर्न आग्रह गरेको हो ।

क्रेडिट कार्ड वाणिज्य बैंक तथा राष्ट्रियस्तरका विकास बैंक र वित्त कम्पनीले जारी गर्ने विद्युतीय भुक्तानीको उपकरण हो । सामान्यतया क्रेडिट कार्ड प्रयोग गरी तोकिएको समयसीमाभित्र रकम भुक्तानी गर्दा कुनै ब्याज लाग्दैन । तर, निर्धारित मितिभित्र भुक्तानी नगरेमा उच्च दरको ब्याज लाग्न सक्ने उल्लेख छ । त्यसैले क्रेडिट कार्डको प्रयोग गरी समयमै रकम भुक्तानी गर्ने बानी बसाल्न समेत केन्द्रीय बैंकले आग्रह गरेको छ ।

क्रेडिट कार्डबारे खरिद सीमा र नगद सीमा, भुक्तानी गर्न पाउने अवधि, पेनाल ब्याज, वार्षिक नवीकरण शुल्क, कारोबार विवरण, माध्यम, दिन र अन्तराल, गुनासो गर्ने प्रक्रिया, अन्य सर्त र अवस्थाहरू बुझ्नुपर्ने उल्लेख छ ।

क्रेडिट कार्डको अनुशासित प्रयोगबाट सुविधा त पाइन्छ नै, तर यसलाई असावधानीपूर्वक प्रयोग गर्दा अधिक ऋणको जोखिम पनि निम्तिन सक्छ भन्दै राष्ट्र बैंकले  सचेत प्रयोगकर्ता बन्न  सबैलाई आग्रह गरेको छ।