रास्वपा सांसदले न्यायाधीशलाई प्रयोग गरेका ‘भरौटे र आसेपासे’ शब्द रेकर्डबाट हटाउन माग

३० वैशाख, काठमाडौं। नेकपा एमालेले आफ्ना संसदीय दलका नेता रामबहादुर थापाले बोलेका कुन–कुन शब्द असंसदीय हुन् भन्नेबारे जानकारी दिन सभामुखसँग माग गरेको छ।

बुधबार बसेको प्रतिनिधि सभाको बैठकमा एमालेका प्रमुख सचेतक ऐन महरले सभामुख डोलप्रसाद अर्यालसँग उक्त स्पष्टीकरण माग्नुभएकाे हाे । यसअघि सभामुख अर्यालले एमाले नेता थापाले प्रयोग गरेका शब्दहरू अमर्यादित र असंसदीय भएको भन्दै संसद् सचिवालयलाई रेकर्डबाट हटाउन निर्देशन दिनुभएकाे थियाे ।

 बैठकमा बोल्दै सचेतक महरले प्रतिनिधि सभा नियमावलीको नियम २१ (घ) को हवाला दिँदै आफ्ना नेताले बोलेका कुन शब्द अशिष्ट भए भनी प्रश्न गर्नुभयाे। उहाँले भन्नुभयाे, ‘प्रतिनिधि सभा नियमावली नियम २१ (घ) मा असंसदीय र अशिष्ट शब्दको बारेमा व्याख्या गरिएको छ। यसको विषयलाई लिएर सभामुखज्यूले हाम्रो दलको नेताले बोलेको शब्दलाई संसदको रेकर्डबाट हटाउन भन्नुभयो, म जानकारी लिन चाहन्छु, कुन कुन शब्दहरू अशिष्ट भए ? हाम्रो नेताले के त्यस्तो अशिष्ट शब्द राख्नुभयो ? त्यसको जानकारी पाउँ।’

 उहाँले राष्ट्रिय स्वतन्त्र पार्टीका संसदीय दलका उपनेता गणेश पराजुलीले न्यायाधीशप्रति प्रयोग गरेका ‘भरौटे’ र ‘आसेपासे’ जस्ता शब्द तत्काल हटाउन समेत माग गर्नुभएकाे छ ।

 संविधानको धारा १०५ उल्लेख गर्दै उहाँले अदालतमा विचाराधीन मुद्दा र न्यायाधीशको कार्यसम्पादनबारे सदनमा छलफल गर्न नहुने तर्क गर्नुभयाे। त्यस्तै रास्वपा सांसद रमेश प्रसाईले प्रयोग गरेको ‘नरसंहार’ जस्ता शब्द पनि असंसदीय भएको भन्दै साे पनि रेकर्डबाट हटाउन माग गर्नुभएकाे छ ।

 एमालेको मागपछि सभामुख अर्यालले नेता रामबहादुर थापाले बोलेका ‘अराजकहरूको भीड’, ‘राष्ट्रिय झण्डा ओढेर देश जलाउनेहरू’ र ‘नेपाली सेना मूकदर्शक’ भन्ने शब्दहरू सभाको अभिलेखबाट हटाइएको जानकारी दिनुभयाे। ती शब्दहरू असंसदीय र अमर्यादित भएको सभामुखले जनाउनुभएकाे छ ।