सरकारको औचित्य पुरै समाप्त भयोः कांग्रेस
२३ भदाै, काठमाडाैँ । नेपाली कांग्रेसका नेता डा शेखर कोइरालाले आजवाट वर्तमान सरकारको औचित्य पुरै समाप्त भएको बताउनुभएको छ। सरकारले भ्रष्टाचारविरूद्ध सडकमा निस्किएका बीस जना युवाको हत्या गरेपछि सामाजिक सञ्जाल मार्फत प्रतिक्रिया दिँदै कोइरालाले अब सरकारको औचित्य पुरै समाप्त भएको उल्लेख गर्नुभएको छ ।
उहाँले फेसबुकमा यस्तो लेख्नुभएकोछ,
प्रिय जेनजी साथीहरु,
आज सरकारका कारण देशमा जे भयो त्यसको परिकल्पना सभ्य समाजमा कसैले पनि गर्न सक्दैन । जनताप्रति अनुत्तरदायी, जनताको आवाज सुन्न र बुझ्न नसक्ने निरंकुश क्रुर सरकारले हातमा किताब कापी बोकेर देश भित्रै आफ्नो उज्ज्वल भविष्यको परिकल्पनामा डुबेको कलिला युवा बिध्यार्थीहरुमाथि बर्वर ढंगवाट गोली प्रहार गरेको छ ।
त्यसको जति निन्दा र भर्त्सना गरे पनि पुग्दैन । सरकारले गरेको तपाईं हाम्रा प्रियजनहरुको हत्याले मलाई मर्माहत बनाएको छ । श्रद्धाञ्जलीका केही शब्दले राष्ट्रकै यो अपुरणीय क्षतिमा मल्हम लगाउन सक्दैन । यस पिडादायी क्षणमा म तपाईं र तपाईंका अभिभावकहरुसँगै छु र रहिरहनेछु ।
तपाईंहरुका माग समय सापेक्ष र जायज छन् । आजको लोकतन्त्रमा आफ्ना कुकृत्य लुकाउन सामाजिक सञ्जाल बन्द गर्नु अधिनायकवाद भन्दा अरु के होला र ? देशवाट भ्रष्टाचार निर्मुल हुनैपर्छ । आजवाट वर्तमान सरकारको औचित्य पुरै समाप्त भएको छ । तपाईं हामी मिलेर देशका हरेक समस्याको विधि सम्मत समाधान खोजौं ।
तपाईंको अभिभावक,
डा शेखर कोईराला
प्रकाशित मिति : २३ भाद्र २०८२, सोमबार २३:००
