भर्याङ हुँ म
भर्याङ हुँ म !
उक्लिने-ओर्लिने
सबैलाई चाहिने
एकै ठाउँमा
निरन्तर उभिरहने।
एकाेहाेराे
सहयोग गरिरहने।
सधैं, प्रयोग मात्रै भैरहने
भर्याङ हुँ म।
मेरो ढाडमा टेकेर
उक्लिनेहरु
तला चढेको उन्मादमा
भाेजभतेर लाउदैछन् ।
बेसुरा गाना गाउँदै
कम्मर मर्काई नाच्दैछन्।
अर्को तला उक्लिन
फेरि, मलाई नै खाेज्दैछन्।
ईमानदार
भर्याङ हुँ म
कर्तव्य पूरा गर्दैछु।
आफ्नो निष्ठामा अडिग रहि
निरन्तर कर्म गर्दैछु ।
–अनुजकुमार श्रेष्ठ
प्रकाशित मिति : २२ श्रावण २०८२, बिहीबार २१:१७
