तीनकुने घटनामा २० जनालाई गोली लागेको प्रहरीको भनाइ

२० चैत, काठमाडौं । नेपाल प्रहरीले राजावादी आन्दोलनका क्रममा २० जनामाथि गोली चलेको पुष्टि गरेको छ । आज आयोजित पत्रकार सम्मेलनमा प्रहरीका केन्द्रीय प्रवक्ता डिआइजी दिनेश आचार्यले काठमाडौंको तीनकुनेमा गत चैत १५ गते भएको हिंसात्मक प्रदर्शन नियन्त्रणमा लिन ५८ राउन्ड गोली चलाइएको र २० जना घाइते भएको बताउनुभयो । गोली लागेर घाइते भएका २० जनामध्ये ७ जना डिस्चार्ज भइसकेको र १३ जना विभिन्न अस्पतालमा उपचाररत रहेको आचार्यले बताउनुभयो ।

५८ राउन्ड गोली, ७४६ राउन्ड टियर ग्यास, १९२ पटक ब्ल्यांक फायर भएको उहाँले जानकारी दिनुभयो। पेस्तोलबाट दुई राउन्ड गोली चलाइएको प्रहरीले जनाएको छ। प्रदर्शनमा ५५ नेपाल प्रहरी र २३ सशस्त्र प्रहरी घाइते भएको प्रहरीको भनाइ छ।