सभामुखलाई भेटेर रविले भनेः मेरो सांसद पद निलम्बन फुकुवा गरियोस्

१९ चैत, काठमाडौं । राष्ट्रिय स्वतन्त्र पार्टी (रास्वपा) का सभापति रवि लामिछानेले सभामुख देवराज घिमिरेलाई भेटेर आफ्नो सांसद पद फुकुवाका लागि आग्रह गर्नुभएको छ । मंगलबार बिहान सभामुख घिमिरेलाई भेटेर सभापति लामिछानेले यस्तो माग गर्नुभएको हो ।

मंगलबार पार्टीका सांसदसहित सभामुख घिमिरेलाई भेट्न लामिछानेले उहाँकै कार्यकक्ष सिंहदरबार पुग्नुभएको थियो । यसअघि गत माघ १८ गते पनि सभामुखलाई भेटेर सभापति लामिछानेले आफ्नो सांसद पद निलम्बन फुकुवा गरिदिन आग्रह गर्नुभएको थियो  ।

गत कात्तिक २ गते सभापति लामिछाने सहकारी ठगी, संगठित अपराध र सम्पत्ति शुद्धीकरण अभियोगमा पक्राउ पर्नुभएको थियो। सोही अभियोगमा मुद्दा दर्ता भएपछि गत पुस ८ गते उहाँको सांसद पद निलम्बन भएको थियो ।