भारी मन लिएर आफ्नै आत्माउपर ‘कु’ गर्दै काँग्रेस परित्याग गरेँः राजकृष्ण श्रेष्ठ

उहाँले सामाजिक सञ्जालमा गर्नुभएको टिप्पणी यस्तो छ

२०१७ पुस १ गते मुलुकमा प्रजातान्त्रिक ब्यवस्था बिरूद्ध राजनीतिक ‘कु’ भएको छेको पारेर मैलै आजकै दिनमा आफ्ना आत्मा उपर ‘कु’ गरेको छु । भारी मनका साथ आजबाट साँढे तीनदशक लामो काँग्रेससंगको आबद्धता ट्टटाएको छु ।
आजबाट म स्वतन्त्र र सचेत नागरिकको हैसियतमा बस्ने निधो गरेको छु। काँग्रेसको आदर्श र चारतारा झण्डामुनी बसेर रूखमा भोटहाल्ने अवस्था बिध्यमान नरहेपछि स्वेच्छिक रूपमा काँग्रेससंगको आबद्धता तोडेको हुँ । यसमा कसैप्रतिको आग्रहपुर्वाग्रह गाँसिएको छैन । र, हैन ।

काँग्रेसमा नेतृत्व चयन प्रणालीमा देखिएको कमजोरीका कारण असल, योग्य र ईमानदार नेता, कार्यकर्ता नेतृत्वमा पुग्ने वातावरण नदेखिएपछि काँग्रेससंगको आबद्धता तोड्नुनै उचित लाग्यो । चारतारा झण्डा र रूखको छहारी मुनि बसेर अन्यत्र भोटहाल्न आफ्नो मनले मानेन । नैतिक रूपमा संकट पर्यो ।

मैले रूखमा भोट हाल्दैगर्दा म भन्दा अयोग्य र असक्षम र नैतिक पतन देखिएकालाई कसरी भोट हाँलु ? जुन कुरा आत्माले नमानेपछि भारी मन लिएर आफ्नै आत्माउपर ‘कु’ गरि काँग्रेस परित्याग गरेको हुँ ।

म त बिपिको विचार सुनेको र पढेको मान्छे हुँ । गिरिजाबाबू, किशुनजी, गणेशमान सिंह, महेन्द्रनारायण निधि, योगप्रसाद उपाध्याय र सुशील कोईराला देखेर, बुझेर हुर्किएको काँग्रेसी हुँ । यस्तोमा काँग्रेसमा रहेर अन्य दल र उम्मेदवारलाई भोटहाल्न मनले नमानेपछि स्वेच्छिक रूपमा काँग्रेसबाट विश्राम लिएँ ।

साथै, मैले काँग्रेससंगको आबद्धता तोडेपनि लोकतन्त्र, बहुदलिय ब्यवस्थाप्रतिको मेरो आस्था, बिश्वास कहिल्यै डगमगाउँने छैन । गणतन्त्रप्रतिको मेरो निष्ठा सदैव रहिरहने छ । अस्तु ।