सल्यानी माइलाले ल्याए ‘आमा र ईश्वर’
९ भदाै, काठमाडाैँ । लेखक समीर शाह (सल्यानी माइला)को खण्डकाव्य ‘आमा र ईश्वर’ सार्वजनिक भएको छ । नेपाल प्रज्ञा–प्रतिष्ठानमा आयोजित लोकार्पण कार्यक्रममा पूर्वमन्त्री तथा पूर्वराजदूत नीलाम्बर आचार्यलगायतले पुस्तकको लोकार्पण गरे ।
आमा नै ईश्वर हुन् र ईश्वर नै आमा हुन् भन्दै लेखकले आफ्नो पुस्तक आमामा समर्पित गरेका छन् । आफ्नी आमाको सम्झना गर्दै लेखकले भूकम्प, रुस–युक्रेन युद्धदेखि कोरोना संक्रमण समेतलाई विषय बनाएका छन् ।
कार्यक्रममा बोल्ने वक्ताहरुले लेखक शाहको खण्डकाव्यको प्रशंसा गरे । कर्णाली प्रदेशका सामाजिक विकास मन्त्री घनश्याम भण्डारी, भाषा आयोगका सदस्यद्वय उषा हमाल र अमर गिरी, नेपाल प्रज्ञा प्रतिष्ठानका प्राज्ञ सदस्य मधुसूदन गिरी, पूर्व सदस्य सचिव जगत् उपाध्याय प्रेक्षित्लयायतले मन्तव्य राखेका थिए । कार्यक्रममा संगीतकार सन्तोष श्रेष्ठले शाहको पुस्तकका केही अंश गाएका थिए ।
मध्यपश्चिम साहित्य परिषद्को अध्यक्षसमेत रहेका शाहको खण्डकाव्य यही संस्थाले प्रकाशन गरेको हो । यसअघि ‘मृत बस्ती’ कविता संग्रहसहित दुई उपन्यास ‘परिदृश्य’ र ‘कुहिरो र क्षितिज’ प्रकाशन गरेका शाह सल्यानमा जन्मेका हुन् । एमए, बीएससी, बीएल गरेका शाह भक्तपुरको लोकन्थलीमा युनिक नेपाल एकेडेमीका संस्थापक अध्यक्ष र अध्यापक हुन् ।
प्रकाशित मिति : ९ भाद्र २०८१, आईतवार १०:०१
