मेघालयको कोइला खानीमा बाढी पस्यो : १३ जना मजदुर बेपत्ता, सबैको ज्यान गएको आशंका
२८ मंसिर, भारत । भारतको उत्तरपूर्वी राज्य मेघालयमा रहेको एक अवैध कोइला खानीमा बाढी पस्दा झण्डै १३ जना कामदार बेपत्ता भएका छन् ।
पूर्वी जैनतिया पहाडको लुमथारी गाउँमा अवैध रुपमा संचालन हुँदै आएको खानीको साँघुरो सुरुङमा बाढी पसेको र खानीभित्र रहेका कामदारहरु भित्रै थुनिएकोले सबैको ज्यान गएको हुन सक्ने आशंका गरिएको छ ।
खानी बाहिर रहेका अरु कामदारहरुले पानी फाल्ने प्रयास गरिरहेको भारतीय सञ्चारमाध्यमले जनाएका छन् । खानीमा बेपत्ता भएकाहरुको खोजी र उद्धार जारी रहेको स्थानीय प्रहरी अधिकारी लेथिन्द्रा सङ्गमाले जानकारी दिनुभयो ।
कोइला खानीमा फसिरहेका १३ जनाकै परिचय खुलेको छ । १३ जनामध्ये चार जना आसामका नागरिक रहेका छन् । ६ जना वेस्ट गारो हिल्स डिस्ट्रिक्टका छन् भने तीन जना स्थानीय नागरिक रहेका छन् ।
मेघालयका विभिन्न कोइला खानीमा नेपाली मजदुरसमेत काम गर्ने गरेका छन् । कोइला खानीको काम निकै जोखिमपूर्ण समेत हुने गरेको छ ।
भारतको एक अदालतले सन् २०१४ पछि यो इलाकामा कोइला खानी खोल्न प्रतिबन्ध लगाएको थियो । प्रतिबन्ध लगाइएपनि अवैध रुपमा अव्यवस्थित कोइला खानी सञ्चालन हुने क्रम नरोकिएको सरकारी अधिकारीहरुले बताएका छन् ।
प्रकाशित मिति : २८ मंसिर २०७५, शुक्रबार १४:४१
