विदेशीसँग प्रतिस्पर्धा गर्न नेपाली चलचित्र सक्षम छनः हरिवंश आचार्य
४ साउन, काठमाडौँ । अभिनेता हरिवंश आचार्यले नेपाली चलचित्र विश्वका जुनसुकै देशका चलचित्रसँग प्रतिस्पर्धा गर्न सक्षम भएको बताउनुभएको छ । कमलपोखरीस्थित चलचित्र भवनमा आज चलचित्र ‘लाज शरणम्’ घोषणा गर्न आयोजित समारोहमा उहाँले नवीनतम सोच भएका युवाको प्रवेशसँगै निर्माण र कथ्यशैलीमा आएको फरक दर्शकले पनि महसुस गरेको बताउनुभयो ।
“नेपाली चलचित्र अहिले विश्वका प्रायः चलचित्र महोत्सवमा सहभागी भएर पुरस्कार जित्न सफल भइसकेका छन् । नेपाली चलचित्रमा विदेशी पनि अभिनय गरिरहेका छन् । त्यसकारण हामी अब कोहीन्दा कम छैनौँ”, अभिनेता आचार्यले भन्नुभयो, “हाँस्य व्यङ्ग्य क्षेत्रका नयाँ पुस्ताको पनि चलचित्र क्षेत्रमा आगमन भएको छ । उहाँहरुलाई स्वागत गर्न पाउँदा उत्साहित छु ।”
‘भद्रगोल’ हुँदै ‘सक्किगोनी’ टेलीशृङ्खलामार्फत अभिनय सुरू गर्नुभएका कलाकार तथा चलचित्र ‘लाज शरणम्’ का निर्देशक कुमार कट्टेलले केही वर्षको प्रयासपछि चलचित्र घोषणा गर्न सक्षम भएको बताउनुभयो । “हामीले शृङ्खलापछि चलचित्र निर्माण गर्ने सोच बनाएर मेहनत गरेका छौँ । यसमा मनोरञ्जनसँगै सामाजिक विकृतिबारे व्यङ्ग्य पनि छ । हामी चलचित्र निर्माण गर्ने समयसम्म आइपुग्नुमा अघिल्ला हाँस्य विधामा काम गर्नुभएका कलाकारको ठूलो योगदान छ”, निर्देशक कट्टेलले भन्नुभयो ।
उक्त अवसरमा निर्देशक दीपाश्री निरौला, प्रदीप भट्टराई, निर्मल शर्मालगायतले चलचित्र क्षेत्रमा स्वागत गर्दै शुभकमना दिनुभयो । सो चलचित्रमा अर्जुन घिमिरे (पाँडे), सागर लम्साल (बले), कमलमणि नेपाल (खुपीका बाउ), माला लिम्बू, विजय बराल, मुकुन्द श्रेष्ठलगायत कलाकारको अभिनय रहनेछ । खलपात्रको रुपमा दर्शक माँझ परिचित अभिनेता श्रेष्ठ १२ वर्षपछि यसै चलचित्रमार्फत अभिनयमा फर्किदै हुनुहुन्छ ।
उक्त कार्यक्रममा हास्य विधामा आधारित रहेर निर्माण भएका टेलीशृङ्खलालाई प्रोत्साहन गर्दै दर्शकसम्म पु¥याएको भन्दै मिडिया हबका सञ्चालक सोम धिताललाई कदर–पत्र र दोसल्लासहित सम्मान गरिएको थियो ।
प्रकाशित मिति : ५ श्रावण २०८१, शनिबार ०८:१४
