संघीय संसद्का दुवै सदनको बैठक बस्दै, यस्ताे छ कार्यसूची
८ जेठ, काठमाडाैं । संघीय संसद्अन्तर्गत दुवै सदनको बैठक आज बस्दैछ। प्रतिनिधिसभाको बैठक बिहान ११ बजे र राष्ट्रियसभाको बैठक दिउँसो १ः१५ बजेका लागि बोलाइएको संसद सचिवालयले जनाएको छ।
सभामुख देवराज घिमिरेले प्रतिनिधिसभाको बैठकमा प्रधानमन्त्री तथा मन्त्रिपरिषद्को कार्यालयबाट प्राप्त कार्यभार थप सम्बन्धी पत्र पढेर सुनाउने कार्यक्रम छ।
त्यस्तै प्रतिनिधिसभा नियमावली, २०७९ को नियम १० बमोजिम बैठकको अध्यक्षता गर्न सदस्यहरूको मनोनयन गर्ने सम्भावित कार्यसूची पनि रहेकाे छ ।
त्यसैगरी प्रधानमन्त्री पुष्पकमल दाहाल ‘प्रचण्ड’ले संघीय संसद्को दुवै सदनको संयुक्त बैठकलाई राष्ट्रपतिले गरेको सम्बोधनको प्रति टेबुल गर्ने, सभामुख घिमिरेले राष्ट्रपतिबाट संसद्को दुवै सदनको संयुक्त बैठकलाई जेठ १ गते गरेको सम्बोधनका लागि धन्यवाद ज्ञापन गर्ने सम्भावित कार्यसूची रहेको समेत संसद् सचिवालयले जनाएको छ।
त्यसैगरी उद्योग, वाणिज्य तथा आपूर्तिमन्त्री दामोदर भण्डारीले ‘लगानी सहजीकरण सम्बन्धी केही नेपाल ऐनलाई संशोधन गर्ने अध्यादेश, २०८१’ पेस गर्ने र शिक्षा, विज्ञान तथा प्रविधिमन्त्री सुमना श्रेष्ठले राष्ट्रियसभामा उत्पत्ति भएको ‘सहिद दशरथ चन्द स्वास्थ्य विज्ञान विश्वविद्यालय विधेयक, २०८० माथि विचार गरियोस्’ भन्ने प्रस्ताव प्रस्तुत गर्ने सम्भावित कार्यसूची छन्।
तर, आजको बैठक पनि कांग्रेस लगायतका बिपक्षी दलले चल्न नदिने सम्भावना छ। सहकारीको रकम अपचलन प्रकरणमा कांग्रेसले गृहमन्त्रीसमेत रहेका रास्वपा सभापति रवि लामिछनेमाथि संसदीय छानविन हुनुपर्ने माग गर्दै लगातार संसद् अवरुद्ध गर्दै आइरहेको छ।
प्रकाशित मिति : ८ जेष्ठ २०८१, मंगलवार ०९:०७
