सिद्धार्थ प्रिमियर इन्स्योरेन्सको नाफा १०९.६५ प्रतिशतले बढ्यो

२१ वैशाख, काठमाडाैं। सिद्धार्थ प्रिमियर इन्स्योरेन्स कम्पनी लिमिटेडले चालु आर्थिक बर्षको तेस्रो त्रैमाससम्ममा ५९ करोड ७१ लाख रुपैयाँ खुद नाफा कमाएकाे छ । यो नाफा अघिल्लो आवको सोही अवधिको तुलनामा १०९.६५ प्रतिशतले बढी हो । अघिल्लो आवको सोही अवधिसम्ममा कम्पनीले २८ करोड ४८ लाख रुपैयाँ खुद नाफा कमाएकाे थियो ।

कम्पनीले समीक्षा अवधिसम्म १ अर्ब ३२ करोड रुपैयाँ खुद बीमाशुल्क आर्जन गरेको छ । जुन अघिल्लो आवको तुलनामा १३८.५५ प्रतिशतले बढी हो । अघिल्लो आवको साेही अवधिसम्ममा कम्पनीले ५५ करोड ६९ लाख खुद बीमाशुल्क आर्जन गरेको थियाे ।

कम्पनीको चुक्तापूँजी २ अर्ब ८० करोड रुपैयाँ रहेको छ । याे अवधिमा कम्पनीकाे प्रतिसेयर आम्दानी(ईपीएस) १९.६८ रुपैयाँबाट बढेर २८.३७ रुपैयाँ कायम भएको छ । भने प्रतिसेयर नेटवर्थ २५४.५९ रुपैयाँ र मूल्य आम्दानी अनुपात २६.४४ गुणा कायम भएको छ ।