सर्वोत्तम सिमेन्टको आईपीओमा दोस्रो दिनसम्म कति पर्यो आवेदन ? यस्तो छ पछिल्लो अपडेट

१४ फागुन, काठमाडौँ । सर्वोत्तम सिमेन्टको आईपीओमा दोस्रो दिनसम्म मागभन्दा ७.९९ गुणा बढी आवेदन परेको छ। सिडिएससी एण्ड क्लियरीङका अनुसार साेमबार साँझसम्ममा कम्पनीकाे आईपीओमा ४ लाख ७ हजार ७११ जना आवेदकबाट ८ अर्ब १ करोड २० लाख ६३ हजार ७ रुपैयाँ बराबरको ८६ लाख ६० हजार ६४० कित्ता सेयर खरिदको लागि आवेदन परेकाे छ ।

कम्पनीले फागुन १३ गतेदेखि सर्वसाधारणमा आईपीओ निष्काशन तथा बिक्री खुला गरेको छ। कम्पनीले स्थानिय बासिन्दाहरुका लागि निष्काशन गरेको सेयरमा आवेदन नपरेको ६ लाख ८१ हजार ५३० कित्ता सहित कुल २७ लाख ७६ हजार ७६ कित्ता सेयर सर्वसाधारणका लागि निष्काशन गरेको हो।

कम्पनीको आईपीओमा लगानीकर्ताले प्रतिकित्ता ३६० रुपैयाँ ९० पैसाका दरले आवेदन दिनु पर्नेछ। लगानीकर्ताले न्यूनतम ५० कित्ता सेयरका लागि आवेदन दिनु पर्नेछ भने अधिकतममा १० हजार कित्तासम्मका लागि फागुन १६ गतेसम्म  आवेदन दिन सक्नेछन्।

कम्पनीको आईपीओ निष्काशन तथा बिक्री प्रबन्धक ग्लोबल आइएमई क्यापिटल लिमिटेड रहेको छ भने सह निष्काशन तथा बिक्री प्रबन्धकमा एनआईएमबि एस क्यापिटल र प्रभु क्यापिटल लिमिटेड रहेको छ।

लगानीकर्ताले नेपाल धितोपत्र बोर्डबाट स्वीकृती प्राप्त गरेका सम्पूर्ण आस्बा सदस्य बैंक तथा वित्तीय संस्थाहरु र तिनका तोकिएका शाखा कार्यालयहरुका साथै सिडिएस एण्ड क्लिरिङ्गद्वारा सञ्चालित सफ्टवेयर मेरो शेयर अनलाइन प्रयोग गरी आवेदन दिन सक्नेछन्।