सीताको भूमिका निर्वाह गर्न उत्सुक छुः अभिनेत्री दिव्या दत्ता
१५ भदाै, काठमाडाैं । भारतीय अभिनेत्री दिव्या दत्ताले बाल्यकालमा आफूले सीतामाताको भूमिका निर्वाह गर्न नपाएको बताइन् । त्रिदिवसीय साहित्य महोत्सव ‘काठमाडौँ–कलिङ साहित्य महोत्सव’ मा सञ्चालित ‘सीताको परीक्षा : दक्षिण एशियामा महिला सङ्घर्ष’ विषयक सत्रमा (सेसन) मा सहभागी भएकी अभिनेत्री दत्ताले स्कुलमा हुँदा सीताको भूमिका गर्न सबै छात्रा उत्साहित हुने गरेको बताइन् ।
“बाल्यकालमा उहाँको बारेमा जति पढेकी छु, सुनेकी छु । त्यहिँ कारणले पनि मलाई उहाँको शालीनतालाई प्रस्तुत गर्न मन थियो तर, त्यो सपनामै सिमित रह्यो”, अभिनेत्री दत्ताले भनिन्, “उहाँलाई पर्दामा मैले प्रस्तुत गर्न पाएँ भने बाल्यकालमा बुझेकी सीता नै प्रस्तुत गर्नेछु ।” उनले सीताको नाम जहिले राम्रो कार्यका लागि लिने गरेको अनुभव सुनाइन् ।
“आशिर्वाद दिँदा होस् या जोडी राम्रो होस् भन्दा पनि सीतारामको जस्तो होस् भनिन्छ । किनकि त्यसको प्रभाव वा सुन्दरता नै फरक छ”, अभिनेत्री दत्ताले भनिन् । महोत्सवमा सहभागी हुन् नेपाल आएकी अभिनेत्री दत्ताले नेपाली भाषा सुन्दर लागेको भन्दै भाषा सिकिरहेको बताइन् । उनी महोत्सवअन्तर्गत चल्ने विभिन्न सत्रमा सहभागी हुनेछिन् ।
प्रकाशित मिति : १५ भाद्र २०८०, शुक्रबार १७:०९
