श्रम सम्झौता गर्न मलेसियाली मन्त्री कात्तिक ११ मा नेपाल आउँदै, श्रममन्त्री विष्टको योजना सफल

–पवित्रा मुडभरी

८ कात्तिक, काठमाडाैँ । मलेसियाका मानव संसाधनमन्त्री एम कुलासेगरन नेपाली कामदार लैजाने समझदारी (एमओयू)मा हस्ताक्षर गर्न यही कात्तिक ११ गते ६ सदस्यीय प्रतिनिधिमण्डलको नेतृत्व गर्दै नेपाल अाउने भएका छन । दुई मुलुकबीच पहिलोपटक कामदारको विषयमा यही कात्तिक १२ गते राजधानीको हायात होटलमा समझदारीमा हस्ताक्षर हुँदै छ ।

एमओयूको निर्देशनअनुसार प्राविधिक समितिले कामदार लैजाने विषय टुंगो लगाउने श्रम मन्त्रालयले जनाएको छ । एमओयूको मस्यौदामा केही साताअघि मलेसियामै समझदारी जुटेको थियो ।

सहमति अनुसार मलेसिया सरकारले नेपाली कामदार लैजाँदा सबै खर्च रोजगारदाताले नै व्यहोर्ने छ । मलेसिया जाने कामदारसँग विभिन्न बहानामा चर्को शुल्क लिएको भन्दै सरकारले गएको जेठ ३ गतेदेखि नेपाली कामदार मलेसिया पठाउन रोक लगाएको थियो । पछिल्लोपटक नेपालले उठाएका कामदारका मुद्दा सम्बोधन हुने गरी मलेसियाले एमओयूको प्रस्ताव गरेको र त्यसमा नेपाली पक्षको हितमा हुने गरी सम्झाैतामा सहमति जुटेको थियो ।

वैदेशिक रोजगारीका लागि मलेसिया जाने कामदार विभिन्न अनधिकृत कम्पनीबाट ठगिएको भन्दै श्रम, रोजगार तथा सामाजिक सुरक्षामन्त्री गोकर्ण विष्टले भिएलएन, जिएसजी, बायोमेट्रिक, आइएससीजस्ता कम्पनी खारेजीको जोखिमपूर्ण निर्णय लिनुभएको थियो । त्यसको विकल्प नहुँदा करिब ६ महिनादेखि नेपाली कामदार रोजगारीका लागि मलेसिया जान पाएका छैनन् ।

यो पनि पढ्नुहोस्

–नेपाल र मलेसियाबीच कामदार आपूर्तिमा भएको सहमति दुबै देशका लागि सुखदः मन्त्री विष्ट