सिन्धुपाल्चोककाे बाह्रबिसे बजार पहिरोसहितको बाढीले बगरमा परिणत

 ३ भदौ, सिन्धुपाल्चोक । सिन्धुपाल्चोककाे बाह्रबिसे बजार पहिरोसहितको बाढीले बगरमा परिणत भएकाे छ । शुक्रबार राति आएको वर्षाले क्षतीग्रस्त बनाएको अरनिको राजमार्गमा रहेको पक्की पुल शनिबार रातिको बाढीले पूर्ण रुपमा बगाएको छ ।

 बाढीले बाह्रबिसे नजिकै रहेको साँधीखोला माथीको पुलको आधा भाग बगाएपछि मोटरसाइकल बाहेकका सवारी साधन चलाउन रोक लगाइएको थियो । तर, शनिबार राति भोटेकोशीको बाढीले पुलको नामोनिशान नै नरहने गरी बगाएको छ ।

 पुलमुनी रहेको ठूलो ढुङ्गा हटाएर सडक विभागले क्षतिग्रस्त पुल मर्मत सुरु गरेपनि राति आएको पहिरोसहितको बाढीले पुल पूर्णरुपमा बगाएको बाह्रविसे नगरपालिकाकी उपमेयर सुशीला पाख्रिनले जानकारी दिइन् । पुल बगाएपछि बैकल्पिक व्यवस्थाको लागि नगरपालिकाले पहल गरिरहेको बाह्रविसे नगरपालिकाका मेयर निमफुञ्जो शेर्पाले जानकारी दिए ।