विश्वकर्मालार्इ रिहा गर्न माग

२४ साउन,काठमाडौँ । नेकपा (माले) ले नेत्रविक्रम चन्द नेतृत्वको नेपाल कम्युनिष्ट पार्टीका स्थायी कमिटी सदस्य तथा प्रवक्ता खड्गबहादुर विश्वकर्मालाई रिहा गर्न सरकारसँग माग गरेको छ । पार्टी महासचिव सिपी मैनालीले आज प्रेस विज्ञप्ति जारी गरी विश्वकर्मा र उहाँसँगै गिरफ्तार गरिएका सबैलाई तत्काल विनाशर्र्त रिहा गर्न आग्रह गर्नुभएको हो ।

विज्ञप्तिमा शान्तिपूर्णरुपमा आफ्ना विचार राख्न र पार्टी सञ्चालनका निम्ति स्वेच्छिकरुपमा आर्थिक सहयोग संकलन गर्न पाउने अधिकारमाथि कुनै पनि बन्देज लगाउन नहुने भनिएको छ । प्रहरीले जबर्जस्ती चन्दा असुलीको आरोपमा विश्वकर्मासहित दुई जनालाई बुधबार दक्षिणकाली नगरपालिकाको चाल्नाखेलबाट पक्राउ गरेको जनाइएको छ ।