चितवनमा एक करोड लागतमा खानेपानी आयोजना निर्माण
४ साउन, चितवन । पूर्वी चितवनको कालिका नगरपालिका–१ गडुवामा रु एक करोड लागतमा खानेपानी आयोजना निर्माण गरिएको छ ।
पोखरास्थित गोर्खा वेल्फेयर ट्रष्ट, ग्रामीण खानेपानी तथा सरसफाइ कार्यक्रमको आर्थिक तथा प्राविधिक सहयोगमा खानेपानी आयोजना निर्माण भएको हो ।
मिटर प्रणालीमा धारासहितको खानेपानी आयोजना सम्पन्न भएपछि स्थानीयवासी हर्षित भएका छन् । बिहीबारमात्रै उक्त खानेपानी आयोजना स्थानीय समुदायलाई हस्तान्तरण गरिएको गडुवा खानेपानी तथा सरसफाइ उपभोक्ता समितिका सचिव चेतकुमार सुनारले जानकारी दिनुभयो ।
उहाँका अनुसार खानेपानी आयोजनाको गतसाल कात्तिकबाट निर्माण शुरु भएको थियो । आयोजनाबाट यहाँ १५८ घरमा मिटर प्रणालीको धारा जडान भएको छ ।
डिप बोरिङ गरी पानी निकालिएको आयोजनाको ३० घनमिटरको ‘ओभरहेड रिजर्भ ट्याङ्की’ रहेको छ । आयोजनामा कूल नौ हजार २३४ मिटर लामो पाइप बिच्छ्याइएको छ ।
आयोजनाको कूल लागत रु एक करोड एक लाख ५२ हजारमध्ये सहयोगी संस्थाबाट रु ८५ लाख ८६ हजार र स्थानीय समुदायको तर्फबाट रु १५ लाख ६६ हजार लागत लागेको आयोजनाले जनाएको छ ।
खानेपानी उपभोक्ता समितिका अध्यक्ष लीलाबहादुर केसीले स्थानीय समुदायले शुद्ध खानेपानी पिउन पाउने भएपछि खुशी व्यक्त गर्नुभयो । निकट भविश्यमै यहाँको लंकालाइन र सूर्यपुरमा समेत खानेपानी आयोजना निर्माण हुने जनाइएको छ ।
कालिका नगरपालिका–१ का वडाध्यक्ष लीलाबहादुर गुरुङले स्थानीय समुदायका लागि खानेपानी आयोजना महत्वपूर्ण उपलब्धि भएको बताउनुभयो ।
प्रकाशित मिति : ४ श्रावण २०७५, शुक्रबार १२:२५
