संसद विघटन मुद्दामा पक्ष विपक्षको बहस सकियो, एमिकस क्युरीको राय बाँकी
२१ असार, काठमाडौँ। प्रतिनिधिसभा विघटन विरुद्धको रिटमाथिको सुनुवाइ अन्तिम चरणमा पुगेको छ। प्रतिनिधिसभा विघटनसम्बन्धी मुद्दामा रिट निवेदक १४६ सांसद र विपक्षी राष्ट्रपति कार्यालय र प्रधानमन्त्रीका तर्फबाट बहस र जवाफी बहस सोमबार सकिएको छ। आइतबारबाट सुरु भएको जवाफी बहस सोमबार सकिएको हो। सोमबार तीन वरिष्ठ अधिवक्ताले बहस गरेपछि जवाफी बहसको समय सकिएको हो ।
सोमबार निवेदकको पक्षबाट बरिष्ठ अधिवक्ताहरू हरिहर दाहाल, बद्री बहादुर कार्की र शम्भु थापाले बहस गर्नुभयाे । प्रधानन्यायाधीश चोलेन्द्रशम्शेर जबरा तथा न्यायाधीश दीपककुमार कार्की, मीरा खड्का, ईश्वरप्रसाद खतिवडा र डा आनन्दमोहन भट्टराईका संवैधानिक इजलासमा प्रतिनिधिसभा विघटनसम्बन्धी रिट निवेदनमा सुनुवाइ भइरहेको छ।
अब संवैधानिक इजलासले एमिकस क्युरीको राय लिनेछ। । एमिकस क्युरीका लागि दुई घण्टा समय तोकिएको छ। एमिकस क्युरीमा नेपाल बार एशोसिएशनबाट वरिष्ठ अधिवक्ताद्वय राघवलाल वैद्य र उषा मल्ल तथा सर्वोच्च बार एशोसिएशनले वरिष्ठ अधिवक्ताद्वय कोमलप्रकाश घिमिरे र प्रकाशबहादुर केसी छन् । एमिकस क्यरीको सुझाब सकिएपछि अन्तिम निर्णय हुनेछ ।
प्रकाशित मिति : २१ असार २०७८, सोमबार १५:०८