कांग्रेसको संसदीय दलको नेतृत्व समेत कमजोर भएको कांग्रेस सांसदहरूको ठहर

७ जेठ, काठमाडाैँ । नेपाली काँग्रेस जिल्ला सभापतिको  ५ नम्बर प्रदेशस्तरीय पहिलो बैठकले प्रदेश नं ५ को संसदीय दलको नेतृत्व कमजोर भएको निष्कर्ष निकालेको छ ।

प्रेस युनियन रुपन्देहीले बुटवलमा आज आयोजना गरेको पत्रकार सम्मेलनमा काँग्रेस रोल्पाका सभापति अमरसिंह पुनले संसदीय दलका नेताका विषयमा केन्द्रीय नेतृत्वलाई सचेत गराउने निर्णय भएको बताउनुभयो ।

काँग्रेस रुपन्देहीका सभापति अब्दुल रज्जाकले पार्टी सभापतिको बैठकले संसदीय दलका नेता बलदेव शर्मा पोखरेललाई प्रभावकारी भूमिका निर्वाह गर्न निर्देशन दिइएको बताउनुभयो ।

प्रदेशसभा सदस्य वीरबहादुर रानाले प्रदेशसभामा विधेयकका विषयमा काँग्रेसको अवस्था स्पष्ट नहँुदा अन्योल थपिएको बताउनुभयो । प्रदेश नं ५ का १२ जिल्लाका सभापतिको बैठकले पार्टीको संघीय संरचना निर्माण तत्काल गर्न केन्द्रलाई अनुरोध गर्ने, संगठनलाई थप अनुशासित र मर्यादित बनाइने, पार्टीको राष्ट्रिय भेलामा विधान संशोधन र पार्टी संगठनका सन्दर्भमा उठाइने विषयमा सुझाव सङ्कलन गर्न तीन सदस्यीय समिति बनाइने लगायत निर्णय भएका छन् ।